#الضغط_خــفّ! الحمدلله، دقيقتين من وقتك معليشي . مقصّر فـ حق ر | دفعة آلآمـل🤍🫶🏻| الشهادة الثانوية ثالثة ثانوي علمي
#الضغط_خــفّ! الحمدلله، دقيقتين من وقتك معليشي . مقصّر فـ حق ربك صح!؟ ما ختمتش التراويح يوم نمشي و يوم لا نرقد عن الصلاة مرة مرة و مرات تفوت فيا و نقطّع فيها قرايا ونفسية تعبانة شوي يوم مرّات متجاوبش كويس والوقت مفيش عبارة عن قرايا ونوم كان صح ولا؟ كلنا و الله. الفترة الي كُنّا فيهـا صعبة ومتقدرش توفّق و تدير الي تبّيه فيها، فـ متحسش روحك متأخر و مش لاحق. بالنسبة لـ رمضان الي توا حني فيه #أفضل من الي فات منّه. # الـعشر_الأواخر. متخليش فرحة العطلة و إنّك تنفّست تنسّيك التقرّب من الله، فـ تاخدها كلها نوم و فراغ، لحّق على روحك و شوف كم كنت مقصّر في الي فات من رمضان و عوّض. رمضان مزال فيه أكثر من أسبوع آخر، التراويح فالجديد مفروض متريحش عليك و تكون كاملة، الليل على طوله الي كنّا نقروا فيه حالياً ما عندناش فيه شيء أهم من القيام، يعني كنت تقرأ لـ إمتحان يحدد درجته التوفيق من الله و توّا وقت فضيت باخل تقـيمه لـ وجه الي موفقك و عاطيك الصحّة والرزق، مش معقولة! ــــــــــــــــــــــــــــــــــــــــــــــــــــــــــــــــــ الأذكار 7 دقائق من وقتك بس ليش باخل؟ و فضلها كبير و تحصّنك و الدعاء الذي يتقدمه الذكر والثناء أفضل وأقرب إلى الإجابة من الدعاء المجرد، و إحني فـ أكثر وقت محتاجين فيه للدعاء لـ ربّي. ﴿فَاذْكُرُونِي أَذْكُرْكُمْ وَاشْكُرُوا لِي وَلَا تَكْفُرُونِ﴾ ﴿الَّذِينَ آمَنُوا وَتَطْمَئِنُّ قُلُوبُهُمْ بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوبُ﴾ وقال الله تعالى:﴿وَذَا النُّونِ إِذْ ذَهَبَ مُغَاضِبًا فَظَنَّ أَنْ لَنْ نَقْدِرَ عَلَيْهِ فَنَادَى فِي الظُّلُمَاتِ أَنْ لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ [87] فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنْجِي الْمُؤْمِنِينَ ﴾ قريت #فاستجبنا! ــــــــــــــــــــــــــــــــــــــــــــــــــــــــــــــــــ بالنّسبة للقرآن والختمة رمضان مزال فيه أكثر من أسبوع يعني الي بادي فـ ختمة يقدر يكمّلها ولو بيبدأ فـ ختمة جديدة يقدر يلحق والي ما بداش لو بيبدأ يلحق لو بيقرأ كل يوم 3 ساعات. والي عزمه أكثر يلحق على ختمين ــــــــــــــــــــــــــــــــــــــــــــــــــــــــــــــــــ و بالنّسبة لـ الّي شايف روحه عليه جبال ذنوب نقولك إنتَ في شهر لـ ربّي عُتقاء من النّار فـ متخافش و باب التوبة مفتوح فـ كل وقت غير أنوى و توكّل و اطلب من ربّي الثبات. ﴿۞ قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ (53) وَأَنِيبُوا إِلَىٰ رَبِّكُمْ وَأَسْلِمُوا لَهُ مِن قَبْلِ أَن يَأْتِيَكُمُ الْعَذَابُ ثُمَّ لَا تُنصَرُونَ (54) وَاتَّبِعُوا أَحْسَنَ مَا أُنزِلَ إِلَيْكُم مِّن رَّبِّكُم مِّن قَبْلِ أَن يَأْتِيَكُمُ الْعَذَابُ بَغْتَةً وَأَنتُمْ لَا تَشْعُرُونَ﴾ قريت #إنّ_الله_يغفر_الذنوب_جميعاً! ــــــــــــــــــــــــــــــــــــــــــــــــــــــــــــــــــ هوا هذا المطلوب، النّفس امّارة بالسوء و أنت مطالب إنّك تجاهدها و #أعظم جهاد هو جهاد النفس، و ما دام إنك تحاول تصلح من نفسّك هذا شيء يفرّح لأن قلبك مزال حيّ و يحاول يستقيم.
لا تنسونا من صالح دُعائكم و وفّقنا الله و إيّاكم لِما يحِبّ و يرضى.
